*ഇനിയില്ല തിരികെ*

ഒരു യാത്ര പോകു,മന്നൊരു നാള് മീ-
മണ്ണിൽ നിൻ,ന്നൊരു വാക്ക് മിണ്ടാതെ നാം...
കളിയല്ല,കളിവാക്ക് ചൊല്ലിയതല്ല ഞാൻ.
കരയല്ലെ,
ഇന്ന്‌ ഞാൻ.... നാളെ നീയും......

പറയാൻ മറന്നു,ഞാനെഴുതിയ വാക്കുകൾ.
പറയാതെ വയ്യനി,ക്കിനിയില്ലാ നാളുകൾ.
ചുവരുകൾ നോക്കി,കഥ പറഞ്ഞീടവേ...
അതിഥി നീ തരികെ,യെൻ മരണ പത്രം.
നാളെ,യെൻ സ്മാരകം ഈ ചുവർ ചിത്രങ്ങൾ-
താഴെ വീണുടയാത്ത നാൾ വരെ മാത്രമായ്.

മഞ്ചലിൻ മണിനാദമകലെ,നിന്നരികത്ത്‌-
തിരയുന്നു,കണ്ണുകൾ ഗഗന സഞ്ചാരിയെ.
ഹൃദയതാളം നിലച്ചീടുക,നിന്നിലും...
അടരു മീ.. മരചില്ലയിൽ,ലൊരു തളിർ-
അഴുകു മീ...വഴി,കരിയിലയെന്ന പോൽ.....

ആദ്യമെൻ നാവിൽ,ച്ചുരത്തിയൊരമ്മയും,
ആദ്യമെൻ നെഞ്ചിലെ താളമായ്,യച്ഛനും.
ആദ്യമെൻ നെറുകയിൽ തൊട്ട് നീ...
ചൊല്ലിയൊ,രാദ്യാക്ഷരമാണ്‌ ഗുരുനാഥനു,മെന്റെ-
കൂട്ടിനായ് കൂടെ പിറക്കാത്ത കൂട്ടുകാർ.....
കണ്ട് ചിരിച്ചവർ,കൂടെ നടന്നവർ,കണ്ടിട്ട് മൊരു-
വാക്ക് മിണ്ടാതെ നിന്നവർ,കണ്ടാലറിഞ്ഞിട്ടും -
കാണാതെ നിന്നവർ-
മുമ്പേ..പറയാതെ യാത്ര പോയ്‌.

അന്നെന്റെ കരളിൽ കുറിച്ചിട്ട പ്രണയമേ..........
മുട്ടിയും തട്ടിയും മുട്ടിയുരുമ്മിയും കൈകോർത്ത്,
പോയ പല യാത്ര,യിന്നോർത്ത് ഞാൻ.
ഇന്ന് ഞാൻ പോകുന്ന യാത്രയിൽ നീയില്ലാ..
എന്റെയും നിന്റെയും സ്വപ്നമില്ലാ...
 
പച്ച പിടിപ്പിച്ച് നട്ടു,വളർത്തിയ-
മണ്ണില്ലാ മധുരക്കനികളില്ലാ...
പൊന്നെന്ന് പൊന്നിൻ കുടമെന്ന്-
പേരിട്ടൊ,രച്ചിയും മകളും കൂട്ടിനില്ലാ...
ചുടു,ചോരക്കളം തീർത്ത് വെട്ടിയും,
കുത്തിയുമെന്റെ,യെന്റെ-
യെന്നാശിച്ച് കൂട്ടിയതൊന്നുമേ...
എന്റെയീ..യാത്രയിൽ കൂടെയില്ലാ..

പട്ട് പുതപ്പിച്ച്‌ പട്ടട കൂട്ടുമ്പോൾ
പത്ത് കൂറായ്ക്കവർ നിന്ന് തേങ്ങി..
ചത്ത്‌ ജീവിച്ചു,ഞാൻ കിടന്നപ്പൊഴും-
വറ്റ് ചോറുമായ്‌ നീ യന്ന് വന്നില്ലാ,
ചത്ത്‌ മണ്ണോട് മണ്ണായ്ക്കഴിഞ്ഞനാൾ-
ചത്ത കാക്കയ്ക്കും പച്ചരി,യൂട്ടി നീ ...

ഇനിയില്ല തൂശൻ,നിലയിട്ടരോണവും-
വിഷു,പക്ഷികൾ പാടിയ പാട്ടുകളും.
പിച്ച വെച്ചൻ,നിതൾ പിച്ചി നോവിക്കാതെ-
പിച്ചക പൂവിൻ സുഗന്ധമാം നാളുകൾ.....

ഇനിയില്ല തിരികെയെൻ മാടത്തിലേയ്,ക്കെന്റെ-
കതിർ വയൽ പൂക്കുന്ന കാണാൻ............
ഇനിയില്ല ബാല്ല്യവും-
ഇനിയില്ല കൗമാര,മിനിയില്ല-
പ്രണയവും കാതങ്ങളും.

ഒരു യാത്ര പോകു,മന്നൊരു നാള് മീ-
മണ്ണിൽ നിൻ,ന്നൊരു വാക്ക് മിണ്ടാതെ നാം...
കളിയല്ല,കളിവാക്ക് ചൊല്ലിയതല്ല ഞാൻ.
കരയല്ലേ....
ഇന്ന്‌ ഞാൻ.... നാളെ നീയും......