വരണമാല്ല്യം കൊതിച്ചവൾ

തുറന്നിട്ട ജാലകവാതിലിലൂടെന്നും പ്രിയനേ..
നിന്നെ ഞാൻ കാത്തിരുന്നു.
കാലമെന്നിൽ യൗവ്വനമാംമോഹ
ജ്വാലയായി ആളിപ്പടർന്നു നിന്നു.
നിദ്രയില്ലാത്തൊരു രാവുകൾ എത്രയോ..
എന്നെ തഴുകി കടന്നു പോയി.

പ്രായം തികഞ്ഞൊരു പെണ്ണന്നറിഞ്ഞവർ
നാലുച്ചുവരുകൾക്കുള്ളിലായി എന്നെ
നാളേയ്ക്കു വേണ്ടി ഒളിച്ചു വെച്ചു
നാലാളു കാണുന്നിടത്തൊന്നും
കാണരുതെന്നു പറഞ്ഞു നിർത്തി
വിലപേശിയെത്തിയവർ പോയി വന്നു എന്നും
കാഴ്ചയ്ക്ക് വേണ്ടിയീഞാനും

ദീർഘസുമംഗലിയായവൾ ഞാൻ
നീല നിശീഥിനി കാത്തിരുന്നു.
മണിയറ വാതിൽ തുറന്നെത്തുമീനേരം
മലർമന്ദഹാസമായി ഞാനുണർന്നു
അവനെന്നെ തഴുകി പുണർന്നൊരു ചുംബനം
മഴയായി പൊഴിഞ്ഞിളം മേനിയിൽ പുൽകി
രാവിൻറെ മാറിലുറങ്ങാൻ കൊതിച്ചൊരു
പനിനീർ പൂവിതാ ചിരിതൂകി നില്ക്കുന്നു
കണ്ണിൽ വിടരുമൊരനുരാഗമാം മഴ
പെയ്തൊഴിയാതെ തുടരുമീ വേളയിൽ
ആരോ വാതിലിൽ മുട്ടി വിളിച്ചു
കാതിൽ സ്വകാര്യം പറഞ്ഞു പോയി

നാളെയും പതിവുപോൽ നിന്നെ കാണാൻ
ചെക്കനും കൂട്ടരും എത്തുമെന്ന്.
കണ്ടതെല്ലാം വെറും സ്വപ്നം മാത്രം
തുറന്നിട്ട ജലകവാതിലിലൂടെന്നും പ്രിയനേ..
നിന്നെ ഞാൻ കാത്തിരുന്നു.