തറവാട്

ഇട നെഞ്ചിൽ ഞാനൊരു വീട് കെട്ടി  
മലയാള മണ്ണിന്റെ മണമുള്ള വീട്        (2)

അന്തിത്തിരിവെയ്ക്കാനമ്മയുണ്ടു,മ്മറ-
ത്തിണ്ണയിൽ നാമ ജപങ്ങളുമായ്-
ഉണ്ണിക്കഥകൾപ്പറഞ്ഞുച്ചിരിക്കുന്ന-
മുത്തശ്ശിയമ്മയെ കാണാം..

ഇന്നെന്തേ..നീ വരാൻ വൈകുന്നതെന്തെന്ന്-
ഓർത്തിരിക്കുന്നെന്റെ,യച്ഛൻ.    
ഏട്ടന്റെ കൈകളിൽ ഇന്നെനിക്കെന്തെന്ന്-
കാത്തിരിക്കാനൊരനുജനും-
രാവേറെയായാലുറങ്ങാതെ വാതിൽക്കൽ
കാത്തിരിക്കാനൊരു പെണ്ണുമുണ്ടേ...

വയലുണ്ട് കതിരുണ്ട്  പാടവരമ്പുണ്ട്
ചെത്തിയും ചെമ്പക,ക്കൂവളവും  
ഉണ്ണികൾക്കോടിക്കളിക്കുവാൻ മുറ്റവും
മുറ്റത്ത്‌ മൂവാണ്ടാൻ മാവുമുണ്ട്.
തൊടിയിലെ കിണർ വെള്ളം കോരിക്കുടിച്ചിട്ട്
മധുരം നുണയുവാൻ നെല്ലിയുണ്ട്
ആ ചക്ക ഈ ചക്ക തേൻ വരിക്ക ചക്ക
ചെങ്കദളിക്കുല വാഴയുണ്ടേ....

Liju Vazhappally