ഇനിയുമൊരു ജന്മമുണ്ടെങ്കിലമ്മേ ..

.

ഉണരില്ലേ..നീയെനിക്കമൃതേകുവാനമ്മേ...
മടിയിൽ തലചായ്ച്ചുറങ്ങാൻ
എന്റെ നെറുകയിൽ
ചുണ്ടിൽ കുറിച്ചൊരു ചുംബനം
മഴയായിപ്പൊഴിയില്ലേ... വീണ്ടും
ഇനിയെന്റെ രാവുകൾക്കൊരു പാട്ടുമൂളുവാൻ
ഒരു കൂട്ടുകാരിയായി അരികത്തിരിക്കുവാൻ
തേനൂറുമാ..കളിക്കൊഞ്ചലെൻ കാതിൽ
മഴയായിപ്പൊഴിയില്ലേ... വീണ്ടും
ഉണരുവാൻ വൈകുന്നതെന്തേ...

ഇനിയുമൊരു ജന്മമുണ്ടെങ്കിൽ തരുമോയെനിക്കുനീ...
മരണമില്ലാത്തൊരുലോകത്ത്‌ മാത്രമായി.അവിടെ  
ഞാനെന്നു നീയെന്നു വെളുപ്പ്‌ കറുപ്പെന്ന
ജാതി ചോദിക്കുന്ന മാംസമില്ലാ....
അതിരില്ലാ മതിലില്ലാ വെട്ടിപ്പിടിക്കുവാനോടി
നടക്കുന്ന  മാനുഷ പേക്കോലമില്ലാ..
അമ്മയെത്തല്ലുന്ന,അച്ഛനെത്തല്ലുന്ന
കുഞ്ഞനുജത്തിക്കു നേരെയടുക്കുന്ന
കാമക്കിരാതങ്ങളില്ലാ...
കാഷായമില്ലൊരു കാക്കിയില്ലാ
വെള്ളപുതച്ചിട്ട് പല്ലിളിച്ചെത്തുന്ന
നാളെയുടെ  പാഴ് ജന്മമില്ലാ
നാടിനും വീടിനും ജന്മം മുഴുവനും
ഭാരമായി നിൽക്കുന്ന ജീവശവങ്ങളില്ലാ..
ചിതയില്ലാ ബലിയില്ലാ കച്ചപുതച്ച
നിൻ മാറത്തു വീണു പൊട്ടിക്കരയുവാൻ
കള്ള ബലിക്കാക്കയില്ലാ..

ഇനിയുമൊരു ജന്മമുണ്ടെങ്കിൽ വരുമോ..
മരണമില്ലാത്തൊരുലോകത്ത്‌ മാത്രമായി.
പുനർജനിച്ചീടുക  എന്നെയുറക്കുവാൻ
പാൽവെണ്ണയൂട്ടി നീ താരാട്ടു പാട്ടുമായി

Liju Vazhappally